كنت فاكرة إن أسوأ حاجة ممكن تحصل لأي ست هي إن جوزها يخونها بره البيت… لحد ما اكتشفت إن جوزي بيخونني جوه بيتي، ومع حد مكنتش أتخيل وجوده أصلاً. أنا “مريم”، متجوزة “عمر” من ٣ سنين. عايشين في شقة كبيرة وجميلة، عمر مهندس ناجح، راجل هادي، كريم، وكل الناس بتحسدني على حنيته وطولة باله عليا. بس من حوالي ٦ شهور، حياتي بدأت تتحول لكابوس بالبطيء. بدأت ألاحظ حاجات غريبة في البيت مفيش تفسير منطقي ليها.
أكل بينقص من التلاجة بالليل. برفاني المفضل بيخلص بسرعة غريبة. فردة حلق ألماظ ضاعت، وبعدين بأسبوع لقيتها محطوطة على التسريحة بشكل مترتب جداً، كأن حد بيتعمد يوريهالي. كل ما كنت أواجه عمر برعبي وإني حاسة إن في حد بيدخل الشقة، كان بياخدني في ح.ضنه ويضحك بهدوء: “إنتي بتنسي يا مريومة، ضغط الشغل مأثر عليكي، محتاجة ترتاحي شوية، ولو خايفة أوي نغير كوالين الباب.” مع الوقت، ومن كتر ما كان بيأكدلي إني بنسى، بدأت أشك في قواي العقلية. بقيت أكتب ملاحظات بكل حاجة بعملها، وأصور الحاجات قبل ما أنام عشان أتأكد إني مش مجنونة.
لحد ما جت الليلة اللي غيرت كل حاجة. عمر قالي إن عنده مأمورية شغل مفاجئة في إسكندرية وهيبات ليلة. ودعته، وقفلت الباب الترباس، وقعدت في الصالة أتفرج على التليفزيون. الساعة ٢ بالليل، النور قطع في العمارة كلها. الدنيا بقت كحل. فتحت كشاف الموبايل، وفي عز السكون ده… سمعت صوت. صوت خطوات خفيفة جداً… جاية من “أوضة الخزين” اللي في آخر الطرقة. الأوضة دي مقفولة بالمفتاح من يوم ما سكنّا، عمر قالي إن فيها كراكيب من شغله القديم ومقفلها عشان التراب، والمفتاح ضاع منه ومكسل يجيب نجار يفتحه.
قلبي كان هيقف من الرعب. كتمت أنفاسي، ومشيت على طراطيف صوابعي ناحية الباب. حطيت ودني على الخشب… سمعت صوت أنفاس منتظمة، وصوت حركة قماش كأن حد بيتقلب على سرير! جسمي كله اتنفض. مكنتش قادرة أتكلم ولا أصرخ. من كتر الرعب، جاتلي فكرة مجنونة. نزلت الموبايل، وشغلت الكاميرا على وضع تصوير الفيديو بالكشاف، ومسكت الموبايل ودخلت العدسة من الفتحة الواسعة اللي تحت عقب الباب، عشان أصور أي حاجة جوه. سحبت الموبايل بعد ثواني… وقعدت على الأرض في الضلمة أشغل الفيديو اللي صورته.
اللي شفته على الشاشة خلاني أحط إيدي على بوقي وأعض على صوابعي عشان أكتم صرختي. الأوضة مكنتش كراكيب أبدًا… الأوضة كانت مفروشة، فيها سرير صغير، وتلاجة صغيرة، وقاعدة على السرير “ست” بتاكل من صينية الأكل اللي أنا عملته إمبارح، ولابسة بيجامتي الحرير اللي دورت عليها كتير ومالقيتهاش! بس الرعب الحقيقي مكنش في وجودها، ولا في إنها عايشة معانا في نفس البيت بقالها شهور… الر.عب كان لما الكشاف ض.رب في وشها في الفيديو.. .
الرعب كان لما الكشاف ض.رب في وشها في الفيديو… الست دي مكنتش غريبة، الست دي كانت نسخة طبق الأصل مني! نفس الملامح، نفس قصة الشعر، وحتى الشامة الصغيرة اللي جنب عيني. كنت ببص لنفسي في الموبايل وأنا قاعدة في الضلمة، فكرة إن في “مريم” تانية عايشة في جدار بيتي خلت عقلي يتوقف عن الاستيعاب. فجأة، النور رجع. وبمجرد ما الكهرباء اشتغلت، سمعت صوت “تكة” المفتاح في باب الشقة. “عمر” رجع! خبيت الموبايل في جيب الروب بسرعة وحاولت أتمالك أعصابي. دخل عمر، وشكله كان مرهق جداً، أول ما شافني واقفة في الطرقة وشي أصفر، جري عليا بخضة:
“مريم! إيه اللي موقفك كدة؟ النور لما قطع قلقت عليكي وقلت لازم أرجع، المأمورية اتأجلت.” كنت ببصله ومش شايفة غير “خاين”. الخيانة المرة دي ملهاش وصف، هو مش بس بيخوني، هو “مخزن” نسخة مني في أوضة الخزين! سألته بصوت بيرتعش: “عمر، إنت معاك مفتاح الأوضة اللي في آخر الطرقة؟” عمر ملامحه اتغيرت في ثانية، الهدوء اللي في عينه اتقلب لبرود غريب، وقال بنبرة حادة مسمعتهاش منه قبل كدة: “قلنا الأوضة دي مقفولة يا مريم، ومفتاحها ضايع. إنتي رجعتي للأوهام تاني؟ ادخلي نامي.”
سكتّ، ودخلت الأوضة عملت نفسي نايمة، بس كنت سامعة حركته في الصالة. سمعت صوت خطواته وهي رايحة ناحية “أوضة الخزين”، وسمعت صوت همس مكتوم… وصوت “ضحكة” نسائية ناعمة طالعة من ورا الباب، نفس ضحكتي بالظبط! تاني يوم الصبح، استنيت عمر ينزل الشغل، وقررت إني مش هفضل ضحية. روحت لمنطقة “الرويعي” وجبت نجار، وقلت له إن مفتاح الأوضة ضاع وعاوزة أفتحها ضروري. النجار بدأ يشتغل في الكالون، وأنا قلبي بيدق مع كل خبطة شاكوش. وأول ما الباب اتفتح، النجار اتصدم ورجع لورا وهو بيشهق:
“يا ساتر يا رب! إيه ده يا مدام؟” دخلت الأوضة وأنا ماسكة أعصابي، بس اللي شفته جوه كان أبشع من الفيديو. الأوضة كانت عبارة عن “متحف لمريم”. الحيطان متغطية بصوري في كل مراحل حياتي، فساتيني القديمة اللي قلت إنها ضاعت متعلقة في شماعات، وريحة برفاني مالية المكان. والست اللي كانت جوه؟ مكنتش موجودة، بس كان في ورقة مكتوبة بخط إيد عمر على السرير: “النهاردة مريم بدأت تشك بزيادة، لازم ننقل (نور) لمكان تاني النهاردة بالليل.. مريم مابقتش آمنة على مشروعنا.”
مشروع؟ ونور مين دي؟ قبل ما أستوعب المكتوب، لقيت باب الشقة الرئيسي بيتفتح، وصوت عمر بينادي بحدة وهو داخل ومعاه حد: “يا مريم.. إنتي فتحتي الأوضة ليه؟” لفت وشي، وشفت عمر واقف، وجنبه الست اللي كانت في الفيديو، كانت واقفة بتبصلي بابتسامة باردة وهي بتقول: “أهلاً يا مريم.. كان نفسي نتقابل في ظروف أحسن من كدة، بس كان لازم تعرفي إن البيت ده مبيشيلش اتنين مريم.” عمر قرب مني ومسك إيدي بقوة، وعينه فيها نظرة عمري ما شفتها، وقال بهدوء مرعب:
“نور تبقى أختك التوأم اللي أهلك فهموكي إنها ماتت وهي صغيرة.. بس الحقيقة إنها كانت “المشروع” اللي أنا شغال عليه من سنين عشان نثبت إن الشخصية ممكن تتبدل بالكامل لو عشنا في نفس الظروف.” حسيت الدنيا بتلف بيا، وصوت عمر بيبعد وهو بيقول: “دلوقتي يا مريم، جه الوقت اللي إنتي فيه تدخلي الأوضة دي.. ونور هي اللي تطلع للصالة.”
وقفت مجمّدة في مكاني، وعيني بتتنقل بين عمر وبين الست اللي واقفة جنبه.. “نور”. كان صعب عليا أصدق إن الملامح دي مش مراية، دي حقيقة، نفس نبرة الصوت وهي بتقول لعمر: “تفتكر هتتعود على القعدة جوه بسرعة يا عمر؟ أنا زهقت من الكتمة.” عمر محاولش حتى يبرر، كان بيتعامل ببرود غريب، وكأني مجرد تجربة فاشلة في معمله. قرب مني ووشوشني بصوت واطي: “مريم، مفيش داعي للمقاومة، إنتي أعصابك تعبت الفترة اللي فاتت وده المثبت في الدفاتر اللي كنت بكتبها.. كل الناس عارفة إن مريم مريضة نفسياً وبدأت تخرف.”
فجأت، النجار اللي كان واقف مذهول حاول يتسحب ويخرج، بس عمر انتبه له وطلّع من جيبه رزمة فلوس كبيرة ورماها له: “انسى إنك شوفت الشقة دي، وإلا مش هتعرف تفتح باب محلّك تاني.” الراجل خد الفلوس وجري وهو بيترعش. عمر زقني بقوة جوه الأوضة، ونور دخلت وراه وهي بتعدل شعرها قدام المراية اللي في الأوضة، المراية اللي أنا كنت بشوف فيها نفسي كل يوم! عمر قفل الباب بالمفتاح من بره، وسمعت صوت تكة الكالون.. التكة اللي كانت بترعبني وهي مقفولة، دلوقت بقت هي سجني.
قعدت على السرير اللي ريحته غريبة، ريحة حد غيري كان عايش مكاني. بدأت أدور في الأوضة بجنون، لازم يكون في مخرج. الأوضة مفيهاش شبابيك لأنها “منور” قديم عمر كان قافله بخشب مدهون بلون الحيطة عشان ميبانش. فتحت التلاجة الصغيرة اللي كانت نور بتاكل منها، لقيت فيها أدوية كتير، حقن مكتوب عليها “مهدئ أعصاب قوي”. فهمت ساعتها ليه كنت بحس بخمول وليه مكنتش بسمع حركتها بوضوح.. عمر كان بيحطلي من الأدوية دي في العصير كل يوم!
عدت ساعات وأنا في الضلمة، لحد ما سمعت صوت حركة بره الأوضة.. صوت ضحك عالي، وصوت مزيكا هادية.. عمر ونور بيتعشوا في الصالة، بيعيشوا حياتي وأنا لسه عايشة!